الرئيسية
من طرف 
وإحـنــــــــــــــا بـنـقـلـــــــــــــــب صــــــــــــــــــور
حسيتوا ولا لسه
ولا من كتر الصور
ولا من كتر اللى ماتوا
ولا من كتر الاغاني والموضات
والتفاهه والكور
معدش يفرق عندنا
ان كنا شوفنا او مشوفناش
كأن كل الدم دوت
حبر احمر فى الصور
كأن كاميرا مصورتش
وراها واحد قلبة موجوع وانفجر
عمال يصور طول حياته
واحنا بنقلب صور
دي صورة اخوكـ اللى انت عنه هتتسأل
ودي صورة البنت اللى كانت زي نسمة القمر
حقيقة هيا مش خيال
وليها ام وليها اب زيك
بس ليلها مش موسيقى بتتسمع ساعة السهر
ليلها المدافع والقنابل والأنين اللى بيعزف
مع النحيب صوت القهر
قلبي انفطر
وانتو ياعلم محتاسين
مين المغني اللى هياخد اللقب
مين المغني اللى هيتسمى الملكـ
آآآآآآآه ياملكـ
سايبنا ليه ولحد امتى
شبابنا بقلوب من حجر
ما يحلهاش غير الاغانى والسمر
خلاص معدش حد حاسس بالصور
يبقى من كتر الصور
ولا من كتر السمر
وان قلت بيعدى الكلام
وميبقاليش غير الكلام
واعيش بقلب بيتحرق
والشعب بيكمل سفر
كأنة راضي بسكاته
ده لأنه عايش فى الفقر
طيب ما الغني معدش بيحس الصور
وهى مش اصلا مش صور
قلبي انفطر
والشعب لسه بيختلف
بين الحجاب والمسخره
معدش حد بيعترف
غير بالشطارة والقماره
وناس تحب الفهلوه
وناس تموت فى المنظره
يا شعب جبتونا لوره
شايفين صور متزينة
لعربية حلوه وبنت حلوه وفيلا حلوه
تحركـ القلب فى شره
معدش حد بيفتكر أخرة حياته فى مقبره
عايشنها لحظة
وهى ايه مبقتش طالبه عكننه
انا شاب عايش حياتي
ما تقولش موت ومقبره
كانة سحر ومش حقيقه
بس حقة مدام محسش بالصور
ده شاب بارد
مش فى قلبة ذرة ايمان بربنا
ودى بنت برده فاكرة برده
زي ناس بتقول بنعرف ربنا
واللى عارف ربنا لازم يحس باي حاجه فى الزمن ده
مش كل حس بيبقى حب وصوت موسيقى
وطير بيضحكـ فى الشجر
مين اللى قال انى بحب
مدام بحبي بحب نفسي
ما دام بحس بكل حاجه فى عين حبيبي
بس مش حسه الصور
فوقى بقى
وفوق بقى ياللى انت قاعد
وكل يوم بيعدى عندكـ
مليون ايميل مليان صور
ومليان دم
امتى هتحس الحقيقه
وامتى تؤمن بالقدر
العيشة مش وردى وامانى
وامنيات فى دمنا
ولا اتخلقنا عشان نعيش فى الدنيا نلهى نفسنا
ونقول بنسعد نفسنا
احنا اتخلقنا عشان نعاهد ربنا
على عهد يحفظ دمنا
جوه الصور
بره الصور
احنا اتخلقنا نُختبر
والدنيا اكبر مختبر
مين اللى عاوز كل حاجه فى دنيته
بس بعديها في صقر
ومين هيسعى فى دنيته
بصوت سلاح او صوت قلم
او اي صوت
ويحس ايه معنى الألم
ويوجعه لون الصور
انا اتوجعت بكلمتى
ونفسي اعمل اى حاجه
وناس كتير زيي حاسه بذنبها
وسعات تكلم نفسها
احنا اتخلقنا عشان نعيش
اشمعنا دول ما بيعشوش
وده كلام نااس كتير
احنا اتخلقنا عشان نشجع
عشان فى عز الفجر ننزل للفريق نستقبله
والفجر يمكن كان بيدن
بس فجر ايه اللى هننزل
من بيوتنا بالآلف نستقبله
احنا اتخلقنا عشان نعيش ونجيب فلوس ونشتغل
نختار عروسة حلوه لينا ونجيب عيال وننشغل
ونعيش لحد ما يكبروا ويتجوزوا
وهكذا
ولحد ما يعدي العمر
ونشوف نتيجه عمرنا فى كشف مقياس العمل
وياترى ناجح زي عادتي فى دنيتي
ولا اتلهيت فى المختبر
...
...
يمكن غلط كل اللى كاتبه
يمكن بضيع وقتى فيه
ومش هيعمل اي حاجه اما اكتبه
يمكن يعدي علينا واحنا نقلبه
ويبقى لون زي الصور
اما اللى شاف مقدرش ينظر للصور
هيقرى كل اللى اتكتب من غير زهق
هيحس قلبي اللى اتحرق
هيقولى رأيه فى الكلام ده ايه
وتعدي زي كلام كتير
عاش ومات جوه الورق
لو الى كاتبه مش هيحس بوجع
مش هيقدر يتنفض
ويعدى جدران الورق
ويغير الدنيا اللى باظت
ويهز دمعة كل واحد
ياخد قراره انه يغير فكرته
ويعيش لحاجه لأخرته
وينسي لحظة دنيته
يعيش يجاهد اي حاجه
اي ذنب معدش قادر يبعده
ما هو اي واحد يرمي نفسه لأي نظرة
واي شهوه
واي غنوه
واي واحد رامي نفسة فى نار سجاره بانجو
واي واحد نفسه يبعد ذنب عنه
بس حاسس قد ايه الضعف ماسكه
يبقى مش قادر يجاهد
وجهادنا فى زمانا انهجر
كانة مكتوب ع اللى عايش
وسط البنادق والمدافع
ما هو برده مكتوب ع القلوب وسط الذنوب
اللى اتملت على العيون وعلى المسامع مننا
يا نعيش نجاهد نفسنا
يا نعيش نغني لبعضنا
ونعيش ننعنش قلبنا
انا مش غلط طول ما الصور دي
وراها ناس بتتقتل
اشمعنى بقعد زي دول وابكي برده زييهم
وكانى شايف دمهم
اشمعنى انا
وناس كتير عايشة الحياة مستمتعه
والصوره بتعدي فى ثواني
زي صوره لأي لوحه فى سكته
يا قسوته
ده الدنيا هتعدي في ثواني
زي كل شخص عدى الصورة ديه
ومش هيبقى الا اللى عمله
والى حسه وحسته
حسيتوا طيب ولا لسه
ولا من كتر الصور
ولا من كتر اللى ماتوا
ولا من كتر الاغاني والموضات
والتفاهه والكور
معدش يفرق عندنا
ان كنا شوفنا أو مشوفناش
وكأن كل الدم ده
حبر أحمر فى الصور
كأن كاميرا مصورتش
وراها واحد قلبة موجوع وانفجر
عمال يصور طول حياته
واحنا بنقلب صور
حسيتو ولا لسه يا
بشـــــــــــــــــر
